#maltese اللغة المالطية، لغة عربية في الاتحاد الأوروبي

 
أنت بتأذن في مالطا! كلنا طبعاً سمعنا المثل ده قبل كده، و معناه ان صوتك مش هايتسمع ولا هيتاخد بيه و ده لأن جزيرة مالطا كانت بالنسبة للشعوب العربية نوعاً ما بعيدة بسبب موقعها الجغرافي اللي مخليها أقرب أكتر لأيطاليا ( 80km من إيطاليا) و  جنوب أوروبا.. لكن لو ركزت على الخريطة هاتلاقيها قريبة جداً لإيطاليا بس برضه مش بعيدة (280km) عن تونس و ليبيا.

 
جزيرة مالطا هي جزيرة أوروبية صغيرة حوالي 300

km، ساحرة و جذابة بسبب جوها المعتدل و شواطئها و شمسها زي بلاد كتير في البحر المتوسط.. لكن هي كمان عضوة في الاتحاد الأوروبي ، و ضمن اتفاقية الشنجين.
في مالطا،اللغتين الرسميتين هما اللغة المالطية و الانجليزية. لو أول مرة تسمع عن اللغة المالطية أحب أعرفك إنها لغة رسمية من لغات الاتحاد الأوروبي ( من أصل 24 لغة) .. بس ايه اللي بيميز لغة أهل البلد دي؟
لو عايز تعرف، ممكن تبدأ تسمع الڤيديو ده لحد بيتكلم مالطي.. حاول أنك تركز على الكلمات و تشوف لو فهمت
حاجة . و بعدين تعالى كمل قراية تاني :)  

https://m.youtube.com/watch?v=beIHWz4ss6E
..
https://m.youtube.com/watch?v=msnlp3gGgXM

.. ها ؟ :) شفت ازاي تقريباً فهمت حاجات كتير؟! ايوه اللغة دي لغة أصلها عربي .. تاريخ اللغة دي بيرجع لاحتلال العرب لجزيرة صقلية و مالطا في القرن ال 9 و مع وجود العرب اتطورت اللغة المالطية اللي تقدر تقول عليها انها مزيج من اللغة الإيطالية حوالي 40%  و اللغة العربية بالأخص اللهجة التونسية  اللي يتشكل حوالي 40% من الكلام و من القواعد النحوية و الأفعال. و ال10% اللي باقيين لغات تانية زي  الإنجليزي و الفرنساوي. اللغة المالطية بتتكتب بحروف لاتيني بس محتفظة بحروف عربية زي حرف ال ح و ال ع و خ .. و ده اللي بيخلي اللغة مختلفة عن اللغات الأوروبية لأن اللغة تعتبر لغة سامية حسب تصنيف علماء اللغة، من نفس العيلة اللي فيها اللغة العربية و العبرية.
 
لو انت شخص من شمال أفريقيا و بالأخص لو من تونس أو الجزائر و بتعرف ايطالي أو حتى فرنساوي، تقدر بسهولة تفهم  كلام الشخص اللي بيتكلم بنسبة كبيرة.. بالنسبة لك هايبقى زي  واحد ايطالي بيتكلم عربي مكسر، هاتعمل مجهود علشان تفهمه، و هو كمان هايفهمك لو أستخدمت كلمات قريبة من اللهجة التونسية..

صحيح أن مالطا مش كبيرة و عدد سكانها تقريباً نص مليون بس، لكن في دروس كتير تعليمية للغة المالطية والدروس دي لطيفة لأن معظم المالطيين بيتكلموا انجليزي ف الشرح بيكون سهل و كمان لأن اللغة قريبة مننا و كمان ممكن تساعدك انك تتعلم ايطالي ..
هاسيبلكم حبة مصادر تقدروا تتعلموا منها اللغة المالطية لو حابين.. و ياريت تكتبولي لو فهمتوا اللغة بسهولة ولا كان عندكم مشكلة في فهمها .. انا شخصياً لقيت أنها سهلة جداً و فهمت حاجات كتير من السياق..صحيح مافهمتش كل الكلمات و لكن قدرت أخمن هما بيتكلموا عن ايه :))

..
http://learn101.org/maltese.php
https://m.youtube.com/watch?v=AgJRqttp9p8
https://m.youtube.com/watch?v=B596oyF0caw
https://m.youtube.com/watch?v=msnlp3gGgXM