تعمل إيه لو فاتك القطر؟

 فاكر/ة كل المحطات و القطارات اللي ضاعت علينا، اللي ضيعناها بارادتنا أو حتى اللي نسيناها . لسه فاكر/ة كلام  الناس عن قد إيه إنت أتأخرت/ي..

لو  فاكر/ة بس لسه مش ندمان/ـة يبقى هنا مكانك، بس ليه الواحد ممكن يضيع القطر و يكون مش ندمان؟

مين قال إن اللي واقف في المحطة مستني يركب القطر ده؟ VIP ممكن يبقى عايز يركب قطر معين على مزاجه، قطر

.شيك و مكيف، مش عايز يتبهدل أو يتعب في الطريق

  و ممكن يكون مستني وقته المناسب اللي لسه ماجاش، بيخاف يسافر بالليل مثلاً أو عايز يتفرج على غروب الشمس في الطريق، و ممكن يكون مستني القطر اللي هايوصله المكان اللي هو عايزه، مش عايز يركب قطر مش عارف أخرته فين بالضبط.. قطر راسي و ريتمه شبه ريتم المسافر.

 و ممكن يكون مش مسافر أصلاً و مش هايركب قطر، مجرد زائر للمحطة عنده طيارة بعد الظهر و هو في الطريق للمطار دخل علشان ياخد فكرة و بعد كده هايكمل رحلته الأساسية، مش أكتر من أنه حب يتفرج على المحطة و الناس اللي بتجري في كل حتة علشان تلحق القطر.

اللي واقف في المحطة ممكن يكون مستني شريك أو صديق يشاركه الرحلة.. مستني ونس علشان مش بيعرف يسافر لواحده علشان يخلي لرحلته طعم.. علشان يضحك من قلبه و يحس إن جمال الرحلة في الطريق و الصحبة، مش دائماً في الوصول بس.

اللي واقف في المحطة ممكن يكون مش معاه تمن التذكرة والرحلة بالنسبة له مكلفة جداً و مش هيكون عنده طاقة أو إستعداد تام أنه ياخد القطر ده.. و يقرر إنه ياخد وقته  و مايضغطش على نفسه لحد ما ظروفه تسمح.

اللي واقف قدام المحطة ممكن يكون مستني وصول قطر حد تاني، أخد الرحلة في إتجاهه علشان يوصله في يوم من الأيام..  علشان بعد كده يكملوا الرحلة سوا على رجليهم و هما بيتكلموا عن كل حاجة في الطريق.

ممكن قطرك يكون إتأخر، أو أنت قررت تفوته بمزاجك حتى، علشان الوصول في التوقيت ده مش مناسب ليك أو مش فارق معاك، ف قولت تدردش مع الناس على المحطة و تعمل محيط إجتماعي في محطتك أو حتى تقف تاكل حاجة علشان تعرف تكمل الطريق و انت طولك مسنود .

في ناس كتير مش بتصدق بوجود قطر في الحياة، أنا منهم :) .. اكتشفت إن في ناس كتير بتجري بسرعة جداً بس مش رايحة في أي إتجاة .. بيلفوا حوالين نفسهم لمجرد إن شخص قالهم إن في قطر طالع الساعة 6 ولازم تاخده لمجرد إن في ناس تانية هاتاخده. و لما تروح المحطة، هتلاقي ناس كتير بتجري علشان تحصل القطر، وتقرر إن هو ده قطرك لأن كل إللي حواليك معتقدين إنه قطر السعادة.

و لما توصل إحتمال كبير هاتندم ندم أكبر من ندم إللي فوت القطر لأنك قدام القطر ده أنت ضيعت وقت و مجهود في الوصول لمكان بعيد تماماً عن وجهتك الأصلية أو إللي تخيلتها و طريق الرجوع ممكن يكون شاق و ممل و أصعب.

  أفتكر/ي يا صديقي/ صديقتي إن مش كل دعوة ليكم  معناها أنه مرحب بيكم في المكان ده.. مش كل مكان فاضي ينفع يبقى مكانك، ومش كل قطر ماشي ينفع يكون قطرك.

إنت اللي لازم تختار/ي إنت عايز/ة إيه فعلاً على حسب إحتياجكم و رغبتكم في المرحلة دي، المهم أننا نعرف سبب وجودنا قدام المحطة و ليه هانفوت القطر و هانكمل نوم ومش هانروح.. و لو لازم نركب قطر يبقى لازم  يكون معانا تذكرة فيها التفاصيل المهمة علشان مانتوهش في زحمة المسافرين و الشنط.

Take care ❤️