السؤال ذو الإجابة الغير مكتملة. من أنا؟
سؤال بدون إجابة!؟
أول ما تيجي تتعرف على حد جديد
السؤال اللي الناس مش بتسأله بس إللي دايماً الناس بتبقى مستنية إجابته منك هو.."من أنت؟" في رأيي .. السؤال ده من أصعب الأسئلة لأن الإجابة مش دايماً معروفة مش دايماً واضحة
هل في إجابة محددة للسؤال ده ؟ أكيد لأ .. لأن لو قولت "أنا إسمي .." ف دي إجابة للسؤال و لو قولت" أنا بادرس Littérature " ف دي برضه إجابة أخرى للسؤال و الأتنين دايماً صح .
أحياناً مش بناخد في عين الإعتبار إن الإنسان مش دايماً بيتعرف بشئ واحد بس.. إحنا مش كائنات وحيدة الخلية
دي حتى الكائنات وحيدة الخلية ممكن يكون ليها كذا وظيفة..
ف مابالك بالحيوانات - بإعتبار يعني إن الإنسان حيوان ناطق و مفكر- ..المهم يعني اللي عاوز أقوله
إنك لو حبيت تعرف نفسك ممكن تلاقي حاجات كتير و معلومات كتير تقدر تقولها عن نفسك و بالرغم من كل الإجابات الممكنة اللامتناهية .. إنت مش دايماً بتكون عارف إنت مين.
على مدار حياتنا إحنا دايماً بنكتشف حاجات في شخصيتنا سواء كانت مستخبية و بتطلع مع موقف أو تجربة معينة أو حتى ماكانتش موجودة من الأصل بس إحنا اكتسبناها بواسطة طرق مختلفة زي الخبرة أو التجربةو ساعتها بس بنقف لحظة مع نفسنا و نقولها إنتِ مش إنتِ !! أنا إتغيرت .. أنا مابقيتش زي زمان
أنا مش نفس الشخص اللي كنت أعرفه
في الوقت ده بندرك إن الصفات و الأفكار إللي حطينها لنفسنا و بنستخدمها في تعريفنا مش دايماً ثابتة .. حتى جنسيتك وجنسك و دينك وإسمك ممكن تغيرهم ..
الغرض :) .. أنا باعتقد إن الإنسان في حالة متغيرة طول حياته , بيكتسب صفات و خبرات و في حاجات بيسبها في السكة و حاجات تانية بينساها .. كل ده بيساهم في تشكيله و في تغييره و نضجه. الأهم إن الإنسان لازم يعرف إنه ممكن يكون كذا حاجة في نفس الوقت و إنه يكون مدرك إن التغيير أجباري في هذا العالم و الأهم لازم يعرف إنه مهم وإن إدراكه لقيمته بيخلي أحياناً لحياته معنى
.
يعني ممكن تكون بتتكلم 4 لغات و درست هندسة و ڤيجين و بتحب الموسيقى و هوايتك التصوير و السفر و عيشت في تلات بلاد قبل كده و عامل دكتوراه و بتلعب چودو .. ولما حد يسألك : إنت مين .. ممكن ترد وتقول "أنا ما أعرفهاش .. أنا لسه باكتشفها.."ـ.
...
Great!
ReplyDelete