Tell me something in Egyptian.
ME - Salam, means Hi and Shukran means Thanks.
Alex - No ! I didn't mean Arabic , I mean Egyptian hieroglyphs.
ME - Haha , funny .. Nobody speaks it now my buddy , Egyptians speak Arabic nowadays.
Alex - ( Sad look) Oh my god! How could you stop using your native language ! Why didn't you resist to keep it alive?
ME - ( sad reaction but no word)
... ده كان حوار بيني و بين واحد صاحبي لسه متعرف عليه
كان سعيد جداً إنه بيتعرف على حد مصري لأول مرة و رغم إن معلوماته مش كتير عن مصر * زي ناس كتير في العالم و ساعات بتكون معلوماتهم غلط* ولكن سألني سؤال مهم ماعرفتش أجاوب عليه
..ليه إحنا ك مصريين - كيميتيين- مش بنستخدم لغتنا المصرية مش اللغة العربية؟
كل بلد في العالم ليها لغتها ,, تركيا تركي , إيران إيراني .. اليونان يوناني و فرنسا فرنساوي
فين لغتنا ؟ و هل اللغة ليها علاقة بالدين ؟ فين هويتنا ؟
ساعات بأحس إن الأشباح عندهم هوية وشخصية أكتر مننا ..
الأتراك و الإيرانيين معظمهم مسلمين و مع ذلك ليهم لغتهم إللي بيفتخروا بيها و بيروجوا ليها و كمان بيتعلموا العربي أحياناً علشان يتعمقوا في الدين.
ساعتها كمان كان في مسلسل إسمه العهد كان فيه ألحان باللغة القبطية و ناس كتير أعجبت بيها ف قررت إني أدور أكتر عن اللغة القبطية لغة كل المصريين وصديقة من الجزائر تفتخر بإنها من الأمازيغ -أي الشعب الأصلي لبلاد المغرب و الجزائر قبل الغزو العربي-و بتتكلم أمازيغي كلغة أم و عربي و فرنسي كمان بطلاقة .. كلمتني ساعتها و قالتلي "إنتم ليه ماحفظتوش على اللغة بتاعتكم ليه ماقاومتوش لغة الغزاة ؟ دي هويتنا .. دي أصول أجدادنا ..دي شخصيتنا و تاريخنا قدام العالم و الحاجة إللي بتخلينا مميزين بين الناس كلها !
قالتلي كمان إحنا بنقاوم اللغة مش الدين.. كل إنسان ليه الحق إنه يختار دينه و توجهاته لكن معارضتنا كان بهدف اللغة و الحفاظ على الشعب. أنا مش عربية أنا أمازيغية جزائرية مسلمة وفخورة بكل هذا و لكن لا أنتمي للعرق العربي لمجرد تحدثي العربية."
و أنا كالعادة سكتت! ,
لما رجعت لتاريخ اللغة المصرية لاقيت إن الهيروغليفية تعتبر أول أو أحياناً تاني لغة في البشرية ! إزاي يكون عندنا كنز زي ده ونفرط فيه؟ إزاي قدرنا نتلون و ننسى كل حاجة عن ماضينا بالسهولة دي ؟ لاقيت كمان إن اللغة القبطية تعتبر من نفس العائلة بتاعة اللغة الهيروغليفية القديمة و لكن فيها إختلافين كبار أولهم إنها مكتوبة بخط أو بحروف يونانية بدل الخط الهيروغليفي
علشان تسهل التواصل بين الكيميتيين و اليونانيين وقت البطالمة و وقت الإسكنر الأكبر كمان .. يعني حوالي 300 قبل ميلاد المسيح * يعني قبل المسيحية و قبل حتى ما المسيح يتولد* بمعنى إن اللغة دي مالهاش أي علاقة بالدين لأن ببساطة مصر أو كيميت كانت كلها بتعبد الأوثان وقتها .
تاني تغيير هو دخول بعض الكلمات اليونانية في اللغة و ده إللي خلاها مختلفة شوية عن الهيروغليفية. ولكن ده مأثرش على اللغة و نطقها وأصالتها.
إستخدام اللغة فضل مستمر حتى بعد الغزو العربي و لكن بسبب منع الحكام للغة و إنتشار الإسلام من أول القرن السابع لحد القرن السابع عشر و أحياناً تعذيب بعض الناطقين بالقبطية في مصر ,,قل إستخدامها ولكن الأماكن الوحيدة إللي حافظت على اللغة هما الكنيسة لأنها كانت لغة الصلوات في وقت ماكانت اللغة القبطية هي لغة البلد ولغة الشعب , و في بعض القرى في الصعيد إللي كانوا مصرين على إستكمال إستخدام اللغة لأنهم كانوا على وعي أكتر مننا بأهميتها و بأن لو عاوز تقضي على حضارة شعب في ثانية .. إقضي على لغته.
ومع ذلك مصطلحات وكلمات كتير دخلت اللغة العربية وهي من أصل قبطي ..حتي لما بتحط حرف ال ب قدام الفعل زي كلمة - بأكل - ده تصريف من تصريفات الأفعال في القبطي
يعني إحنا بنتكلم عربي بس بنصرف الأفعال بالقبطي😀😀
قررت بعد المواقف دي إني أبدأ أتعلم لغتي الأصلية . لغتي إللي كانت ومازالت لكل المصريين أصحاب الحضارة و العقل المستنير.. أحفاد المصريين و أبناء الأقباط .. أبناء المصريين
لغة أرض الخير .. الأرض المباركة و الشعب الجميل و أقدم لغة في التاريخ لسه موجودة ..
كفاية إنكار وتزوير للتاريخ.. الدين واللغة لا يختلطان.. هناك برازيلين مسلمين و هناك أمازيغ يهود.
هم ليس برتغاليين لأنهم يتحدثون البرتغالية وليس عرب لأنهم مسلمين
و هؤلاء ليس عرب لأنهم يعيشون في بلد يتحدث العربية و ليس إسرائليين لأنهم يهود.
فلنسمي الأشياء بأسمائها الحقيقية ! ..
اللغة إللي بقالها الاف السنين شعب كيميت بيستخدمها .. من القرن الثاني والثلاثين قبل الميلاد يعني حوالي أربع الاف سنة وممكن أكتر و لغة العلوم و التكنولوجيا و الفضاء و الفن و الإبتكار .. لغة الشعب الحر و هويته, اللغة إللي كانت للجميع مسيحي و مسلم و يهودي و ملحد و وثني
.
شيء غريب جداً إنك تلاقي ناس معاها حضارة وتاريخ يخليهم يقدروا حضارة عظيمة حديثة زي القديمة و يفضلوا إنهم يرموا تاريخهم و مستقبلهم و ينسوا الحاضر .. و الأغرب إن أجانب كتير عاوزين يتعلموا اللغة دي و حابين يدرسوها علشان تعتبر أقرب لغة للغة الفرعونية و علشان يقولوا بس إنهم ليهم علاقة أو يقدروا يتعرفوا أكتر على أقوي و أكبر و أقدم حضارات الكوكب كله ! و إحنا مش فارق معانا حاجة طول ما إحنا كويسين .. أصل المجهود متعب !
خسارة , كم هو مريح الجهل! للأسف
إبدأ بنفسك ! رجع تاريخك .. رجع صورتك قدام العالم.. مجرد البحث عن اللغة و تقديرها سواء خط هيروغليفي أو ديموطيقي أو قبطي مش فارق.. المهم أن كل شخص مصري يعرف أصوله و يفتخر بيها.
تحت هنا في مراجع و لينكات للتعرف على اللغة القبطية .
Some Links to learn Coptic .. you can find thousands of Videos on Youtube in English and Arabic
and there are some good books in French as well .
Good luck :)
http://www.omniglot.com/writing/coptic.htm
https://en.wikipedia.org/wiki/Coptic_language
https://www.duolingo.com/comment/21335426/Any-good-resources-for-learning-Coptic
http://www.copticplace.com/coptic_languge/coptic.html
